Здыміце з сэрца майго гэтую журбу: хутчэй напішыце мне пра яго вяртанне...
А. дэ Сент-Экзюперы.
2 мая Народны літаратурны тэатр “Жывое слова” прапануе паглядзець гісторыю адной вандроўкі “Вяртанне” паводле казкі Антуана дэ Сент-Экзюперы “Маленькі прынц” і твораў іншых аўтараў. Гэта абноўлены спектакль з новымі ўдзельнікамі. Ведаем, што чарговы паказ вельмі чакаюць прыхільнікі нашага тэатра, каб зноў вярнуцца а 19-й у 500-ую аўдыторыю - малую залу БДПУ.
Калі вы ніколі не чыталі казку “Маленькі прынц”, то вас чакае шмат адкрыццяў падчас вандроўкі з героямі пастаноўкі па зямным свеце дарослых і іншапланетным космасе думак, фантазій і ўспамінаў, да якіх хочацца вяртацца і вяртацца не раз.
У тых, хто чытаў твор А. дэ Сент-Экзюперы, відавочна, узнікала пытанне, што ўсё ж такі здарылася з Маленькім прынцам, бо гэта хвалявала і самога аўтара. Мы прапануем вам сваю версію далейшых падзей.
Заўсёдныя наведвальнікі “Жывога слова” ведаюць любоў нашага тэатра да гульні з літаратурнымі тэкстамі розных аўтараў. Таму ў вас будзе магчымасць праз гэтую пастаноўку вярнуцца да творчасці не толькі А. дэ Сент-Экзюперы, але і У. Караткевіча, Р. Брэдберы і М. Бараноўскага, творы якіх у тым ці іншым выглядзе ўжо ставіліся на сцэне тэатра.
Запрашаем студэнтаў і выкладчыкаў, сяброў і проста аматараў мастацтва 2 мая а 19-й у малую залу БДПУ (аўд. 500, 2-гі корпус БДПУ, вул. Савецкая,18).
Замова квіткоў па тэлефоне +375295071141